Tolosaldeko Enpresa Gida argitaratu du Tolosaldea Garatzeneko Enpresa Sailak

Datozen egunotan enpresaz enpresa banatuko dute ale fisikoa, eta bertsio digitala edonork deskargatu ahal izango du garapen agentziaren webgunetik.

53 industrigune eta 600 enpresa baino gehiago ditu Tolosaldeak. Ez dira nolanahiko datuak, eskualdeak ehun sendoa duela erakusten dutenak baizik. 

Guztien arteko elkar ezagutza eta harremanak sustatzea da erronketako bat, eta helburu horrekin eguneratu du, Tolosaldea Garatzenek, Enpresa Gida.

Enpresen informazio orokorra eta kontakturako datuak biltzen ditu gidak: telefonoa, emaila, webgunea, kokalekua, langile kopurua… Informazioa udalerrien, sektorearen eta jarduera motaren arabera sailkatuta dago, bilaketa errazteko. Eskualdeko industriagune guztien planoa ere txertatu da dokumentuan.

Gida enpresa eta udal guztietara banatuko dute datozen egunotan, eta bertsio digitala deskargatu ahal izango du interesa duen edonork.

“Tolosaldea Garatzenetik enpresen arteko lankidetza sustatu nahi dugu, eta tresna hau hori lortzen lagunduko duen oinarri bat izan daiteke”, azaldu du Aimar Arzelus Telleria, saileko arduradunak.